BUTUAN CITY – Mi-resign si kanhi British government minister Peter Mandelson isip miyembro sa Labour Party ni Prime Minister Keir Starmer human migawas ang bag-ong mga report kalabot sa iyang koneksyon sa US sex offender nga si Jeffrey Epstein.
Si Mandelson, nga gitaktak ni Starmer isip ambassador sa U.S. ning miaging tuig tungod sa mga naha-unang pagbutyag sa iyang relasyon kang Epstein, mi-ingon nga dili siya gusto nga makahatag og dugang nga kaulaw sa partido.
Gipadayag niya nga ang mga alegasyon nga nakadawat siya og $75,000 gikan kang Epstein dili tinuod ug iyang imbestigahan kini. Niadtong 1990s, si Mandelson adunay dakong papel sa kalampusan sa Labour Party ubos sa liderato ni Tony Blair.
Apan sa iyang karera, nakasinati siya og daghang kontrobersiya ug duha ka resignation sa gabinete tungod sa mga isyu sa loan ug passport scandal.
Ang iyang pag-resign karon nagtimaan sa padayon nga epekto sa mga pagbutyag bahin sa koneksyon sa mga politiko ug artista kang Epstein, samtang si Starmer nanawagan usab nga si Prince Andrew motestigo sa U.S. congressional committee kalabot sa iyang kaugalingong relasyon sa maong kaso.
