BUTUAN CITY- Nagpahimangno ang Bangko Sentral ng Pilipinas kon BSP Mindanao Regional Office sa publiko pinaagi sa Peso Caravan Program nga dalhon ug ipabaylo ang mga unfit ug mutilated nga kwarta sa mga currency exchange centers (CECs) aron ma-ilisan kini og bag-ong “fit” nga bank notes ug coins nga angay pa gamiton sa sirkulasyon.
Sumala ni Glizriel Rose Quijada, Regional Economic Staff sa BSP, nga ang maong programa kabahin sa adbokasiya sa BSP nga “a cleaner currency environment” diin ang mga karaan, nangadaot, nabasa, nangagisi, nitaya o nabuslot nga salapi dili na angay gamiton ug kinahanglan pa-ilisan og mga bag-ong kwarta.
Sigon pa ni Quijada, nga gipangusgan sa BSP ang pakigtambayayong sa mga lokal nga bangko sa Butuan City aron sila ang modawat sa mga nadaot nga kwarta gikan sa publiko ug dayon dad-on sa BSP alang sa pormal nga pagbaylo.
Dugang pa ni Quijada, nga ang Peso Caravan Program naglangkob lamang sa pagbaylo sa mga unfit ug mutilated nga kwarta ug dili apil ang mga “fit” nga coins nga anaa pa sa maayong kondisyon.
Giklaro usab sa BSP, nga ang programa nagtumong sa pag-ilis sa mga nangagisi, nag-fade, nagtaya, nabuslot o nabrown nga bank notes ug coins, base sa klarong pamantayan sa BSP.
Gipasabot pa niini nga ang proseso sa pagbaylo libre ug mahimo sa bisan unsang currency exchange centers partner banks sa Butuan City, ug gidasig ang publiko nga didto mo-diritso sa CECs imbes sa BSP mismo aron malikayan ang dugang nga kalangan sa transaksyon.
