BUTUAN CITY – Giplano karon sa probinsyal nga panggamhanan sa Dinagat Islands ang paghatag og permanenteng kapuy-an sa mga Dinagatnons nga nawad-an og pinuy-anan sa paghapak sa bagyong Odette.
Sigon ni Vice Governor Nilo Demerey Jr., inisyal nang nakahatag ang National Housing Authority kon NHA og tag-5 mil pesos ngadto sa matag-pamilyang nagub-an og balay, partially o totally damaged man.
Aminado kining daghan pa ang wala makadawat sa maong kantidad apan wala matud pa’y angayang kabalak-an tungod kay ma-apod niini ang tanang Dinagatnons nga nawad-an og balay.
Dugang sa opisyal, ang mga duna’y partially damaged lang nga balay, hatagan og 20-mil pesos samtang 30-mil pesos usab sa mga totally damaged na ang pinuy-anan.
Apan ang musunod nga hugna sa maong ayuda, ipaagi na sa mga construction materials ug dili na sa salaping cash.
