BUTUAN CITY – Padayon pang gisuta sa ginsakupan sa Butuan City Police Station 3 kung pila ang nadalang salaping cash sa wala pa mailang mga responsable human gilungkab ang People’s Bank of Caraga sa Brgy. Libertad ning siyudad.
Nadiskubrehan kini kaganinang ala-1:30 sa hapon human nga usa sa mga empleyado sa usa ka motorcycle distribution center, kansa tapad lang sa maong bangko, nangabli sa ilang tindahan.
Sigon sa empleyadong gitago lang sa pangalang Junjun, karong hapon lang siya mi-report sa trabaho tungod kay holiday man.
Nakurat na lang siya dihang sa pag-abli sa ilang buhatan, gibalbag na ang kongkreto nilang dingding diin didto milusot ang wala pa masutang ihap sa mga responsable.
Milusot matud pa sa ilang tindahan ang mga suspek human gigabas ang grill sa likod nga bahin kansa gigamitan pa og ma panapton aron minos ang mamugnang kasaba.
Duna’y narekober sa sulod nga bahin sa motorcycle display center ang duha ka .38 revolver. (Beth Ruiz)
