BUTUAN CITY – Napalgan nang wala’y kinabuhi kaganinang alas-tres sa kaadlawon ang usa ka empleyado sa Agusan del Sur-Provincial Environment and Natural Resources Office (PENRO) human na-anod sa tubig baha atol sa pagkuso-kuso sa bagyong Vicky.
Naila ang biktimang si Ian Paje Batisting, 29-anyos, minyo, residente sa Brgy. San Isidro, lungsod sa Talacogon, Agusan del Sur.
Migawas sa imbestigasyon nga ang biktima padulong na unta sa Talacogon uban sa iyang ka-ubanan sa trabaho nga si Amasona Mogadez Mondejar, 26-anyos, minyo ug residente sa Purok-2, Brgy. Labnig sa susamang lungsod.
Sakay sila sa usa ka motorsiklo apan pag-abot nila sa Brgy. Tagapua, lungsod sa San Francisco sa susamang lalawigan, natumba kini tungod sa kakusog sa sulog sa tubig ug mideretso sila sa culvert.
Swerteng naluwas si Mondejar sa mga residente apan paspas nga gi-anod si Batisting rason sa gilusad nga search and rescue operation hangtud nga napalgan na lang kini nga wala na’y kinabuhi.
