BUTUAN CITY – Mi-abot sa 2,248 ka mga classrooms kon lawak-tunghaan gikan sa 391 ka mga tunghaan sa entiro Caraga Region ang nadamyos human ang sunod-sunod nga kusog nga linog ning mi-aging mga semana.
Sigon ni Pedro Tecson, tigpamaba sa Department of Education kon DepEd-Caraga, sa maong ihap, 803 niini ang na-classify nga major damage rason nga dili na magamit samtang 857 ang duna’y minor damage samtang 588 ang kinahanglang tukuran na gayod og bag-o.
Gikan sa maong ihap usab, ang DepEd-Agusan del Norte nakatala og 542 ka mga damyos; 440 sa Butuan City; 309 sa Agusan del Sur; 209 sa Bayugan City; 163 sa Bislig City; 31 sa Cabadbaran City; 108 sa Dinagat Islands; 57 sa Siargao Islands; 159 sa Surigao City; 48 sa Surigao del Norte; 119 sa Surigao del Sur ug 63 sa Tandag City.
Base sa gihimong assessment sa mga engineers, magkinahanglan sila og 3-bilyunes, 422-milyunes, 715-mil pisos aron magastuhan ang maong mga tunghaan ug matrabaho sa musunod nga mga tuig.
Giklaro usab sa opisyal nga base sa ilang nadawat nga listahan gikan sa managlahing division offices, duna’y natalang kapin sa 800 ka mga estudyante ug kapin usab sa 400 ka mga magtutudlo ang na-trauma ug naka-angkon og minor injuries apan wala’y angayang kabalak-an.
Samtang balik na sugod niadtong Lunes ang face-to-face classes sa mga estudyante human ang suspensyon niini ning mi-aging weekend tungod sa mga pagtay-og.
