BUTUAN CITY – Gikumpirma ni Police Regional Office kon PRO-13 spokesperson PMajor Dorothy Tumulak nga nalumos-patay si PCol. Francisco Dungo Jr., kaganinang alas-9:40 sa buntag samtang naligo og dagat sa lungsod sa Marihatag, Surigao del Sur.
Sa eksklusibong pakighinabi sa Bombo Radyo Butuan, gipadayag ni Major Tumulak nga base sa report nga ilang nadawat, nadala matud pa sa kusog nga sulog sa tubig-dagat ang police officer hinungdan sa iyang pagkalumos.
Gidala pa kini sa Marihatag District Hospital apan gideklara kining dead-on-arrival sa attending physician.
Gikasubo usab sa PRO-13 ang maong hitabo ilabina nga dako kini og na-abag sa kalampusan sa operasyon sa regional headquarters dihang na-assign kini sa managlahing police units sa Caraga adiser nabalhin ngadto sa PNP Headquarters sa Camp Crame.
Aminado si Major Tumulak nga dakong kawad-on sa han-ay sa kapulisan si Col. Dungo tungod kay sobra kini ka-dedicated sa iyang trabaho.
