BUTUAN CITY – Nakadawat og 28 ka radio challenge gikan sa barko sa China ang Philippine Coast Guard (PCG) ug Bureau of Fisheries and Aquatic Resources (BFAR) samtang nagpatuman og Maritime Domain Awareness (MDA) flight sa Bajo de Masinloc kagahapon Biyernes.
Sumala sa PCG, gigamit nila ang eroplano sa BFAR dihang nadawat nila ang mga radio challenge gikan sa barko sa People’s Liberation Army–Navy, nga nahimutang sa 81.42 nautical miles sa amihanan-sidlakan sa Bajo de Masinloc.
Nakita usab sa PCG ang duha ka boya nga gipanag-iyahan sa China duol sa Bajo de Masinloc, ingon man ang usa ka fighter jet. Ang maong eroplano nagpatuman og mga maniobra mga alas 10:30 sa buntag, sa gitas-on nga kapin 6,000 ka tiil.
Gitubag sa PCG ang mga radio challenge ug gipadayag nga ang MDA flights gibuhat subay sa international law.
Gipasiguro sa PCG nga ipadayon nila ang regular nga MDA operations alang sa kaluwasan sa mga Pilipinong mangingisda ug alang usab sa soberenya sa Pilipinas.
