BUTUAN CITY – Naka-abot na sa Republic of Korea si Pangulong Ferdinand ‘Bongbong’ Marcos Jr uban si First Lady Liza Araneta-Marcos human ang iyang malampusong pag-apil sa 47th Association of Southeast Asian Nations kon ASEAN Summit and Related Summits sa Malaysia.
Kini aron motambong sa 32nd Asia-Pacific Economic Cooperation (APEC) Economic Leaders’ Meeting (AELM) sugod kaong adlawa Oktubre 30 hangtod sa Nobyembre 2, ubos sa temang “Building Sustainable Tomorrow: Connect, Innovate, Prosper.”
Maghi-usa karong tuiga ang mga lider ug delegado gikan sa 21 ka mga membrong nasud aron maglatid og direksyon alang sa usa ka tuig nga deliberasyon ug kooperasyon sa pamatigayon, digital transformation, ug sustainability.
Sa iyang pre-departure briefing, gipadayag sa presidente nga ang iyang pagtambong sa maong kalihukan, magpamatood sa komitment sa Pilipinas sa panglantaw sa APEC alang sa usa ka mas bukas, ma-uswagon, ug dinamiko nga Asia-Pacific, taliwala sa nagbag-o nga kalihokan sa rehiyon.
Ang duha ka sesyon sa Leaders’ Meeting gilauman nga magmugna og upat ka nag-unang dokumento, lakip na ang APEC Leaders’ Declaration ug tuloka mga pamahayag kalabot sa artificial intelligence (AI), demographic change, ug cultural and creative industries — mga prayoridad nga giila sa Republic of Korea isip host karong tuiga.
