BUTUAN CITY – Gipadayag sa Malacañang nga nabalaka si Pangulong Ferdinand “Bongbong” Marcos Jr. sa posibleng epekto sa mga impeachment complaints nga gipasaka batok kaniya—dili alang sa iyang kaugalingon, kundili alang sa kaayohan sa nasod ug sa ekonomiya.
Sumala ni Palace Press Officer Usec. Claire Castro, ang pagpasaka sa impeachment complaint batok sa Presidente adunay lapad nga implikasyon ug posibleng maka-apekto dili lang sa liderato kondili apil usab sa kahimtang sa ekonomiya sa nasod.
Giklaro ni Castro nga nagpabiling kumpiyansa ang presidente nga wala siya’y nahimong sayop, wala’y gilapas nga balaod, ug wala’y nabuhat nga impeachable offense apan bisan pa, nabalaka gihapon siya sa posibleng epekto sa proseso sa pagsalig sa publiko ug sa dagan sa ekonomiya.
Gibarugan usab ang Palasyo nga wala sila’y kalabotan sa pagpasaka sa duha ka impeachment complaints batok kang Vice President Sara Duterte dayong butyag nga anaa na sa kamot sa Kongreso ang pagsusi ug pagdesisyon sa mga kaso batok sa ikaduhang Pangulo.
Dugang pa ni Castro, halos wala ra’y bag-o sa duha ka kasong gioasaka batok sa Bise Presidente nga kung aduna man, gamay ra kaayo.
