BUTUAN CITY – Mag-agad na sa legal team ni Pangulong Ferdinand Marcos Jr. kung mutambong siya o dili sa deliberasyon sa House Committee on Justice isip respondent sa impeachment complaints nga gisang-at batok kaniya.
Sumala ni Palace Press Officer USec. Claire Castro, kung pormal nga imbitahon ang Pangulo ug masabtan nga sulod kini sa patakaran, ang tubag o pakiglambigit sa pangulo magdepende sa iyang legal team.
Gibutyag ni Castro nga maghulat pa ang Palasyo sa aksyon sa House of Representatives bahin sa planong pag-imbitar kang Marcos ilabina nga kinahanglan pa nga susihon sa Kamara kung aduna kini igong porma ug substance.
Pormal nang gitakda sa House Committee on Justice, nga gipangulohan ni Batangas Rep. Gerville Luistro, ang initial review sa impeachment complaints batok kang PBBM sa Lunes, Pebrero 2.
Nagpagawas na usab og notice of meeting ang Komite ngadto sa mga miyembro sa House nga nag-endoso sa maong impeachment complaints.
