BUTUAN CITY – Giklaro ni P/MAJ. Renel Serrano, tigpamaba sa Police Regional Office 13 nga “No one is above the law” human nasikop sa Philippine Benevolent Missionaries Association (PBMA) supreme leader Ruben Ecleo Jr. sa Pampanga kagahapong adlawa.
Kini atol sa gipahigayong operasyon sa kapulisan sa National Capital Region Police Office kon NCRPO diin gipaningkamutan sa intelligence community nga matud-an ang gipuy-an niini human ang unang pagkasikop kang KAPA Founder Joel Apolinario.
Nasayrang 14 ka tuig nga nagtago-tago si Ecleo Jr. ug kagahapon lamang sa alas-4:30 sa kaadlawon kini nadakpan uban ang driver niining si Benjie Relacion Fernan alyas “Smile”.
Sa eksklusibong pakighinabi sa Bombo Radyo Butuan, gipadayag ni Major Serrano nga unom ka buwang gipa-ilalom sa surveillance si Ecleo kinsa nahukman nang guilty.
Gipaniguro usab sa opisyal nga mahatag ngadto sa informant ang 2-milyunes pesos nga reward money alang niadtong nagtudlo sa nahimutangan niini nga miresulta sa iyang pagkasikop.
Mahinumdumang niadtong Abril 2012, napulo ka tuig human napalgan ang patay’ng lawas sa iyang asawang si Alona Bacolod-Ecleo sulod sa kolor itom nga garbage bag nga gilabay sa pangpang sa Dalaguete, gihukmang guilty si Ecleo Jr. sa kasong parricide ug napahamtangan og reclusion perpetua kon dili mu-ubos sa 30 ka tuig nga pagkakabilanggo.
Gimanduan usab siyang bayaran ang mga na-ilong kabanay og P25 -million nga compensatory damages, nga magrepresenta sa dapat unta kitaon ni Alona kung kini nakatapos pa ug naka-practice og medicine.
Gihukman usab kini og 31-ka tuig nga pagkabilanggo sa Sandiganbayan sa tulo ka ihap sa kasong graft niadtong siya pa ang mayor sa lungsod San Jose, Dinagat Island, tungod sa sobrang bayad sa konstruksyon sa duha ka mga municipal buildings ug tungog sa paggasto sa public funds alang sa women’s center nga gipanag-iyahan sa iyang grupong PBMA.
Niadtong Hunyo 2002, mi-abot sa 23 ka mga tawo ang patay sa usa ka gabiing engkwentro dihang arestuhon na unta sa mga pulis ang lider sa PBMA sa isla sa Dinagat hangtud nga mitahan na kini.
Natigayon ang shootout tali sa mga pulis sa Police Regional Office-13 ug sa mga sundalo sa 20th Infantry Battalion — nga duna pa’y air support gikan sa duha ka mga MG-520 helicopters — nga mao unta’y mag-serve kang Ecleo sa warrant of arrest tungod sa pagpatay niini sa iyang asawang fourth-year medical student pa niadtong Enero a-6 sa maong tuig.
Samtang nagkagubot ang Dinagat island, gipusil-patay usab sa wala pa niadto ma-ilhing armadong lalaki si Ben Bacolod, ang igsoon ug bugtong saksi sa pagpatay kang Alona, sulod sa ilang balay sa Mandaue City, Cebu, ka-uban ang ilang amahang si Elpidio ug inahang si Rosalia.
Sigon sa mga nakasaksi, gipatay ang pamilya Bacolod pinaagi sa automatic fire kondiin pareho silang duna’y mga samad-pinusilan sa ulo samtang apil pa sa napatay ang ilang sililngang si Engr. Paterno Lactawan.
Ang gunman, nga namatay sa pakig-engkwentro sa migukod kaniyang mga pulis, na-ila sa ngadto-ngadtong si Rico Gumonong, 28-anyos, usa ka kumpirmadong aktibong PBMA member ug security guard sa Postal Bank sa Cebu City.
