BUTUAN CITY – Aminado si Pangulong Ferdinand Marcos Jr. nga duna siyay mga higala sa Kamara nga nagsugyot kaniya nga manginlabot sa isyu sa impeachment complaint batok kang Vice President Sara Duterte.
Apan sumala sa pangulo, dili niini hilabtan ang impeachment case gumikan kay wala kini papel sa maong kaso isip ehekutibo. Gani, sa higayong mangilabot matud pa siya, posible siyang mapalagpot sa pwesto.
Gibutyag niini nga ang desisyon sa Korte Suprema, gibase lamang sa procedural issue ug dili sa sulod o merito sa reklamo ug wala nagpasabot nga husto o sayop ang mga akusasyon sa impeachment case.
Dugang ni Marcos, gipasabot lamang sa korte nga wala nadumala sa hustong pamaagi ang impeachment complaint.
Gipaboran usab niini si Palace Press Office Usec. Claire Castro sa iyang pamahayag nga dili ang Marcos administration ang nagpaluyo sa impeachment case, apan ang House of Representatives lamang.
