BUTUAN CITY – Gibarugan sa Malacañang nga legal ang pagka-aresto ni kanhi Pangulong Rodrigo Duterte dayong butyag nga ang mga alegasyon batuk sa papel sa administrasyon, wala’y basehan.
Sigon ni Palace Press Officer Undersecretary Atty. Claire Castro, ang intensyon ni kanhi National Youth Commission chairperson Ronald Cardema ug sa iyang asawang si Marie Cardema, pag-file og impeachment complaint batuk kang Pangulong Ferdinand ‘Bongbong’ Marcos Jr., tungod kini sa pagka-aresto sa kanhi pangulo.
Bisan og katungod matud pa nila ang pag-file og impeachment complaint, apan gibarugan sa gobyerno ang commitment niini ngadto sa Interpol nga i-serve ang warrant nga gi-isyu sa International Criminal Court (ICC) sa The Hague, Netherlands.
Una nang gipadayag kagahapon sa magti-ayong Cardema nga wala gidawat sa buhatan ni House Secretary General Reginald Velasco ang ilang impeachment complaint bisan kini og beripikado tungod kay gi-endorso kini ni Duterte Youth partylist lawmaker Ducielle Cardema.
Si Ducielle mao ang igsoon ni Ronald, nga maoy chairperson sa Duterte Youth.
Kagahapon usab, giduso sa mga lider ang usa ka petisyon ngadto sa Commission on Elections (Comelec) nga nagtinguhang kanselahon ang registration sa Duterte Youth partylist, base na sa pagkumpirma sa National Union of Peoples’ Lawyers (NULP).
