BUTUAN CITY – Miabot na sa Pilipinas ang patay’ng lawas ni Overseas Filipino Worker’s kon OFW Mary Ann De Vera, ang Filipina Caregiver nga namatay sa missile attack sa Tel Aviv, Israel.
Napauli siya sa Maynila kaganinang alas 4:30 sa buntag kauban ang iyang bana nga si Bernie Lavarias, nga bag-ohay lag personal nga gihimamat ni Israeli President Isaac Herzog para ipaabot ang pahasubo sa ilang pamilya.
Nagpaabot og pag-ampo, pahasubo og tibook nga suporta usab ang mga opisyal sa Department of Migrant Workers (DMW), Overseas Workers Welfare Administration (OWWA), H.E. Dana Kursh, ug ubang miyembro sa Kongreso ug representante sa Senado nga misugat sa patay’ng lawas sa OFW nga si Mary Ann isip pag-ila sa iyang kaisog og sakripisyo samtang gihimo ang iyang trabaho.
Gisiguro sa Israeli government ang tibook kinabuhi nga suporta sa pamilya ni De Vera sumala pa ni Israeli Ambassador to the Philippines Dana Kursh.
Gipasabot ni Kursh nga sa ilalom sa balaod sa Israel, ang pamilya o indibidwal nga nasakitan o namatay sa kagubot, katawhan man sa Israel o langyaw makadawat og lifetime benefits.
Si De Vera namatay sa retaliatory strike sa Iran sa Israel human nga maglusad ang nasud kauban ang US og pag-atake sa Iran.
