BUTUAN CITY – Gihulat pa karun ang resulta sa gihimong autopsy sa patay’ng lawas sa usa ka babaye nga nakaplagan kagahapon sa hapon sa Barangay El Rio, Sibagat, Agusan Del Sur.
Kini aron masuta ang hinungdan sa kamatayon niini ilabina kay walay nakitang samad sa iyang lawas. Sigon ni Police Capt. Joel Ablan, Officer-in-charge kon OIC sa Sibagat Municipal Police Station, nga bandang alas 2:40 sa hapon sa dihang gitaho ngadto kanila ang nakit-an sa mga minor-de-edad nga patay’ng lawas nga anaa sa kanal sa daplin sa kalsada.
Sa inisyal nga imbestigasyon, usa ka babaye ang biktima nga anaa sa pangedarong 20 ngadto sa 30-anyos, 5’2 ang giban-banang katas-on og curly ang buhok.
Sumala sa opisyal nga base sa pakisusi sa SOCO, kaadlawon pa namatay ang biktima nga hangtud sa karun padayon pang giila.
Nanawagan nalang si Police Capt. Ablan sa tanang katawhan ilabina sa kasikbit nga mga kalungsuran nga kung duna silay nahibal-ang nawalang babaye, motawag lang sa Sibagat MUnicipal POlice Station.
