BUTUAN CITY – Nahimong tensiyunado ang kahimtang sa Capitec Bank sa South Africa human ang usa ka pamilya ang wala na makapugong sa ilang kalagot ug gidala ang patay’ng lawas sa ilang kabanay sulod mismo sa bangko.
Base sa mga report ug mga video nga nikatap sa social media, makita ang patay’ng lawas nga giputos ug gipahimutang sa sawog duol sa customer service area.
Sumala sa pamilya, napugos sila sa paghimo niini isip ebidensiya sa kamatayon sa ilang kabanay human sila gilisod-lisod sa ilang gi-claim nga funeral insurance.
Tungod sa maong insidente, daling gipagawas ang mga empleyado ug mga kustomer, ingon man temporaryong gisirad-an ang maong bangko alang sa seguridad ug sanitasyon.
Tungod niini gipadayag sa mga kadagkoan sa bangko nga ang ila lang gipangayo mao ang death certificate nga maoy gikinahanglan aron ma-proseso ang bisan unsang claim ug dili ang patayng lawas.
Gisusi na karon sa maong kompanya ang maong hitabo aron masiguro nga dili na masubli ang makapakurat nga eksena.
