BUTUAN CITY – Ningsaka na sa 17 ang patay sa passenger van nga gilamoy sa kalayo bandang alas 12:48 sa udto, Marso 25.
Nahitabo ang aksidente sa kurbadang bahin nga dalan sa Luhong, Antipas, North Cotabato. Nalambigit sa maong aksidente sa usa ka pampasaherong van nga gi manihuan ni Mark Anthony “Nonoy” Bunda nga nagtangag sa plaka numero MWB 911 ug usa ka damtruck nga gimaneho ni Edwin Dumapias Nasiad, 49 anyos, residente sa Purok 2, Tulungan, Guihing, Digos City.
Kahibaloang padulong Kidapawan City ang van samtang padulong sa direksyon sa Arakan ang damtruck nga kargado ug graba, apan sumala sa imbitigasyon sa kapulisan, nawad an ug control ang driver sa damtruck hinungdan nga gidaro niini ang nahisgutang van.
Sa kakusog sa impak, ningdilaab ang duha ka mga nalambigit nga bihikulo hinungdan nga naugdaw ang mga pasahero sa van, tungod sa kapaspas sa pagulbo sa kalayo.
Pipila sa nailhan nga nangamatay sila si Mark Anthony Bunda ang driver sa van, inahan ug anak nga si Vince Lopez ug Irish Lopez, Jenevie Vicente, Shirley Pojas ug anak nga si Coco Pojas, Perseveranda Balolong, usa ka principal ug bana niini nga si Ernesto Balolong Sr ug Kimberly Shaine Armada, 20 anyos, bugtong nga anak, og 3rd year nursing student sa North Valley Foundation College sa Kidapawan City.
Sa pikas bahin, padayon pang nagpa alim sa balay tambalanan sila si Rosario Reyes, Edwin Dumapias Nasiad, ang driver sa truck, Wilmark Josil Panoy helper sa damtruck ug pasahero niining si Gregorio Wallace Casiño.
Samtang luwas ug nagpa alim sa iyang balay ang usa sa mga pasahero sa van nga kanhi Brgy Chairman sa Antipas.
Sa pinaka ulahing report, padayon pang gi-ila ang mga pangalan sa ubang biktima.
