BUTUAN CITY – Gikumpirma sa Iranian state media nga mi-abot na sa 201 ang kumpirmadong patay ug 747 ang samaran sa 24 ka lalawigan sa Iran tungod sa joint strikes sa Amerika ug Israel.
Gika-ingon nga 85 ka tawo ang napatay human na-igo ang usa ka girls’ primary school sa Minab, sa habagatang bahin sa Iran.
Sigon ni Foreign Minister Abbas Araghchi, nahugno ang school building alang sa mga batang babaye nga nahimutang sulod sa 60 metros gikan sa usa ka Iranian military base, ug kaniadto usa kini ka base militar apan gika-ingon nga wala na kini gigamit sukad pa sa 2016.
Padayon pang gisusi ang gilapdon sa kadaot ug ang insaktong ihap sa mga biktima samtang nagkagrabe ang tensyon sa rehiyon. Wala pa usa’y independent confirmation sa kinatibuk-ang ihap sa mga namatay.
Sumala ni United States Central Command spokesperson Tim Hawkins, nakahibalo sila sa mga reports kalabot sa civilian casualties ug gi-verify pa kini.
Gibutyag niini nga prayoridad sa Amerika ang proteksyon sa mga sibilyan ug nagpadayon ang tanang lakang aron maminusan ang risgo sa rehiyon.
Kini nga insidente nagpakita sa grabe nga epekto sa mga sibilyan sa kasamtangang gubat, ug nagdugang pa sa kabalaka nga molapad pa ang tensyon sa tibuok Middle East.
