BUTUAN CITY – Milapas na sa usa ka libo ang death toll sa hajj pilgrimage nga gipahigayon sa Sauri Arabia kansa mao ang pinakadakong panagtappok sa mga Muslim sa tibuok kalibutan.
Tungod kini sa dili mabangbang nga heatwave kondiin ang temperatura, mi-abot na 50-degrees Celsius.
Makita ang makalilisang nga mga hulagway sa mga tawong gipangkarga sa mga stretchers ug kadtong nangakuyapan sa kadalanan tungod sa wala na makaya nilang ka-init sa adlaw samtang ang uban, nakasinati og grabeng heatstroke.
Nasuta nga ang mga dili rehistradong pilgrims, halos katunga sa gidaghanon sa mga tawong wala’y access sa mga air-conditioned facilities ug tabang gikan sa mga otoridad.
Mi-abot na sa 10 ka mga nasud ang nagtaho nga mi-abot na sa 1,081 ang death toll atol sa pilgrimage, kansa usa sa lima ka mga pillars sa Islam kondiin ang tanang mga Muslims nga duna’y ikakaya, kinahanglang mukompleto niini bisan ka-usa man lang sa ilang tibuok kinabuhi.
Ang national meteorological centre mitaho nga ning semana lang, mi-abot sa 51.8 degrees Celsius ang temperatura sa Grand Mosque sa Mecca.
