BUTUAN CITY – Anaa na sa kostudiya sa kapulisan sa Bunawan, Agusan del Sur, ang driver sa dump truck nga nakabangga og usa ka Toyota Hi-Ace van kagahapon sa Purok 3-B, Barobo, Brgy. Libertad, sakop sa maong lungsod nga gikamatay sa tulo ka mga tawo.
Naila ang driver nga si Junrey Durado, 33-anyos, minyo og residente sa Talacogon, Agusan del Sur.
Sigon ni PO2 Peter Obiel sa Bunawan Municipal Police Station, mi-overtake matud pa ang kusog nga nagdagang van sa nag-una niyang sakyanan resulta nga nabangga kini sa kasugat nga trak.
Tungod nini, on-the-spot nga namatay ang duha ka mga pasaherong sila John Marl Warkis, 30-anyos residente sa Brgy. Poblacion, lungsod sa Prosperidad og Romeo Andres,66-anyos, residente sa brgy. Libertad sakop sa lungsod sa Bunawan.
Daling gidala sa ospital ang ubang mga pasahero sa van aron matambalan apan pag-abot sa ospital, gidekralang patay usab ang driver sa van nga si Romy Cabana, 42-anyos, residente sa M’lang. Cotabato City.
Nakig-alayon na sila ngadto sa mga kabanay sa mga biktima aron masayran kung mupasaka ba sila og kaso o kaha makig-areglo na lang. (Beth Ruiz)
