BUTUAN CITY – Misaka na sa 81 ka mga tawo ang patay, 66 ang angol ug 34 ang missing sa pagkuso-kuso sa bagyong Kristine sa nasud. Sigon ni Office of the Civil Defense (OCD) Administrator ug Undersecretary Ariel Nepomuceno, subject for validation ug verification pa ang maong ihap.
Sa datus usab sa National Disaster Risk Reduction and Management Council (NDRRMC) kaganinang buntag, mi-abot sa kinatibuk-ang 547 ka mga lugar ang gibaha sa 13 ka mga rehiyon sa nasud. Pinaka-nagrabihan ang Brgy. Sampaloc sa Talisay City, lalawigan sa Batangas tungod sa landslides nga duna na’y daghang mga nakalas ug nagkasaka pa.
Apil sa nakalas ang igsoon ug lima ka mga pag-umangkon ni Zaldy Pumbales nga nangatulog dihang natigayon ang landslide tungod kay narekober nila ang mga patay’ng lawas nga kondiin nagtutoy pa ang iyang kinamanghurang pag-umangkon sa dede sa iyang manghod. Nagpatabang siya kang Pangulong Bongbong Marcos nga ma-uli sa ilang lalawigan sa Masbate ang mga biktima aron didto ra malubong.
Samtang dako usab ang pasalamat sa ginang nga si Hazel Ann Echin nga nabalikan pa sila sa iyang bana gikan nag-charge og cell phone rason nga nakalingkawas sila gikan sa tinong kamatayon. Ang iya lang reklamo tungod kay tapot-lawas silang nakabiya sa ilang pinuy-anan nga apil sa natabunan sa landslide.
