BUTUAN CITY – Mi-abot na sa 34 ka mga tawo ang patay sa pagkuso-kuso sa bagyong Carina ug sa Southwest Monsoon kon Habagat.
Sigon sa Philippine National Police (PNP), ang hinungdan sa kamatayon sa mga biktima mao ang pagkalumos, natabunan sa midahiling yuta, nakuryentihan ug natumbahan og punuan.
Sa CALABARZON kon Cavite, Batangas, Rizal ug Quezon, gibutyag sa Police Region Office 4-A nga 12 ka mga tawo ang gikatahong namatay, apil na ang lima sa Batangas, upat sa Rizal ug tulo sa Cavite.
Duha usab ang missing sa Cavite ug Rizal samtang unom ang angol.
Sa Metro Manila, gibutyag sa National Capital Region Police Office (NCRPO), nga 11 ka mga tawo ang namatay lakip na ang tag-3 sa Manila ug Quezon City, tag-usa sa mga siyudad sa Malabon, Valenzuela, San Juan, Mandaluyong, ug Pasay ug wao usab ang angol sa Quezon City.
Samtang sa Central Luzon, gibutyag sa Police Regional Office 3 nga siyam ang natala nilang patay apil na ang unom sa Bulacan ug tulo sa Pampanga samtang duha usab ang missing sa Bataan ug sa Zambales.
Gideklara ang state of calamity sa Cavite; Pinamalayan ug Baco sa Oriental Mindoro; San Andres sa Romblon; Jose Abad Santos sa Davao Occidental; Kabacan ug Pikit sa Cotabato, Bataan, Bulacan, Cavite, Batangas ug sa Metro Manila.
