BUTUAN CITY – Tulo na ang nakalas sa tropa sa gobyerno nga gi-ambush sa mga rebeldeng New People’s Army kon NPA ning mi-aging adlaw didto sa Sitio Menbahandi, Brgy. Camagong, Nasipit, Agusan del Norte.
Kini human nakabsan sa kinabuhi kagabii samtang gitambalan sa ospital ang CAFGU member nga si Erwin Mandahinog, 27-anyos, ang nagmaneho sa habal-habal nga gisakyan nila sa laing tulo ka mga ka-ubanan human nagdula og basketball.
Mahinumdumang patay on-the-spot sa maong hitabo ang ilang CADRE man nga si Staff Sargent Sahari Jamjahare og ang laing CAFGU member nga si Totong Sulaygay samtang nakalingkawas sa tinong kamatayon si Benjie Binungcasan human naka-ambak og nakadagan palayo sa ambush site.
Hustisya gihapon ang singgit sa kabanay sa mga biktima ilabina dihang nasuta nga wala sila’y dalang armas niadtong higayuna.
Pinaagi sa Bombo Radyo Butuan, nanawagan ang inahan sa pinaka-ulahing nakalas nga si Alma Mandahinog ngadto sa walhong grupo nga ipasabot kanila ang hinungdan nganong gihimo nila kini ngadto sa iyang anak og mga ka-ubanan. Gusto niining maklaro unsa ang sala sa iyang anak. (Beth Ruiz)
