BOMBO BUTUAN – Gikumpirma sa Office of the Civil Defense kon OCD-Caraga nga mi-abot na sa 14 ka mga tawo ang patay, 15 ang angol og usa pa ang missing, sa pagkuso-kuso sa bagyong Basyang dinhe sa rehiyon.

Sa kasamtangan, duna pa gihapo’y 721 ka mga pamilya kon 3,327 ka mga indibidwal ang nagpabilin pa sa 15 na lang gikan sa 183 ka mga gi-ablihang evacuation centers.

Gipahayag usab ni Eunice Montaus – information officer sa Department of Social Welfare and Development kon DSWD-Caraga nga muabot usab sa 155 ka balay ang totally damaged samtang 309 ang partially damaged.

Sa estado sa kadalanan, maagi-an na sa tanang klase sa sakyanan ang lungsod sa Jabonga, apil na sa lungsod sa Kitcharao sa Agusan del Norte nga una nang nasira tungod sa mga insidente sa landslides ug flashfloods.

Gi-ayo na usab sa mga personahe sa Department of Public Works and Highways kon DPWH Caraga ang pipila ka tulay nga dunay minor damage tungod sa baha.

Nakahatag na usab sila og augmentation support sa mga LGUs nga hilabihang gikuso-kuso sa bagyo sama sa mga lungsod sa Sison, Gigaquit ug Mainit sa Surigao del Norte ug Carrascal sa Surigao del Sur. (Rolan Janea)