BUTUAN CITY- Mingsaka na sa 21 ang ihap sa mga namatay gikan sa bagyong Inday ug habagat, dungan niini nanawagan ang mga residente sa mga gibahang komunidad sa southern Mindanao og dali-ang tabang.
Mingsaka ang ihap sa mga namatay human gikomperma sa rescuers ang pagkarekober sa tulo ka patay’ng lawas sa Barangay Tanuman, Jose Abad Santos, Davao Occidental.
Sumala ni Jose Abad Santos Mayor Jason John Joyce, lakip ang mga biktima sa gidagit sa baha nga mingguba sa maong barangay niadtong Hulyo 10, nga mingguba sa mga kadalanan ug kabalayan.
Una na usab nga gitaho sa mga awtoridad nga natala ang unom nga pagkamatay sa Malapatan, pito sa Calanogas ug duha sa Bukidnon.
Anna sa 450 ka pamilya usab sa Barangay Mudan sa Glan, Sarangani province ang na-displace sa baha ug pagkahunlak sa yuta nunot sa dul-an tulo ka adlaw nga walay hunong sa pag-ulan.
Sa kinatibuk-an, aduna nay tunga sa milyon ka mga residente ang apektado sa halapad nga pagbaha sa Bangsamoro Autonomous Region in Muslim Mindanao kon BARMM.
Sa kasamtangan, pipila sa mga gikinahanglang tabang sa mga apektadong komunidad mao ang pagkaon, luwas nga ilimnong tubig, tents ug construction materials alang sa pag-reconstruct sa ilang nagubang mga panilamalay.
