BUTUAN CITY – Gimanduan ni Agusan Del Sur Provincial Governor Sante Cane jr ngadto sa kapulisan sa iyang probinsiya nga mohatag kaniya og resulta sa ilang gihimong imbestigasyon mahitungod sa sunod-sunod nga tulis.
Boot ni Governor Cane nga duna nay mailhan nga suspetsado ang kapulisan aron kini mapaslak sa bilangguan og mapasakahan og kaso. Sumala pa sa opisyal nga kinahanglang maresolba ang mga insidente sa tulis aron mahatagan og saktong seguridad ang mga tawong molabay sa Agusan Del Sur.
Gitawag pa ni Governor Cane ang bag-ong insidente sa mga tulis nga special nga kaso tungod kay nagdungan kini sa pagkahitabo. Lakip sa kinahanglang masayran kung usa raba ka grupo ang mibuhat niini.
Mahinumdumang sa nakalabay nga adlaw, natala ang tulo ka insidente sa pagpanulis ang probinsiya sa Agusan Del Sur kondiin ang una, nahitabo sa may PUrok-4, Barangay Langkilaan, lungsod sa Trento, pasado alas 12:00 sa udtu diin gitulis ang panel sa segarilyo ug natangag sa wala pa mailang mga suspetsado ang 20-mil pesos nga kantidad sa kwarta.
Nasundan kini pagka-alas 2:00 sa hapon diin gitulis ang sakyanan sa frozen product sa may Purok-1 Boan, Barangay Wasian, lungsod sa Rosario, ug muabot sa 125-mil pesos ang nakuhang salaping cash.
Samtang pag-abot og alas 4:00 sa hapon, ang kauban sa panel sa segarilyo nga unang gitulis, nabiktima usab sa mga tulisan sa may Purok-2, Barangay Lapinigan, lungsod sa San Francisco ug muabot sa 23-mil, 500 pesos og tulo ka rims sa segarilyo ang nadala sa wala pa mailang mga suspetsado.
