BUTUAN CITY – Malampusong nahimugso sa usa ka 20-anyos nga babaye ang iyang anak samtang sakay sa usa sa mga barko sa Cokaliong Shipping Lines gikan sa Cebu City padulong sa Surigao City pasado alas– 8:20 sa gabii.
Sigon sa asuy sa usa sa mga pasaherong si Shella Yu Yap, igo lang unta magpahungaw sa tawag sa kina-iyahan ang mabdos nga si Jodelyn Ruadiel, residente sa lungsod sa Carrascal, lalawigan sa Surigao del Sur dihang kalit lang kining misinggit og nagpanawag og tabang human nga kalit lang migawas ang bata gikan sa iyang sabakan.
Luwas nga nakuha gikan sa inidoro ang bata dihang na-abtan sa tulo ka mga doktor, usa ka nurse, ug mga personahe sa Bureau of Fire Protection (BFP) Bacuag nga sakay niadtong higayona sa maong barko.
Naninggit ang mga pasahero dihang nakitang buhi nga nakagawas sa pansayan ang maong bata nga ginganlan nila og Gregoria Coka.
