BUTUAN CITY – Nag-atubang na og patung-patung nga kaso ang usa ka pari human gi-aresto sa mga sakop sa National Bureau of Investigation kon NBI tungod sa alegasyong pagpanglugos sa usa ka 16-anyos nga dalagita.
Naila ang suspek nga si Rev. Fr. Karole Reward Israel, lumolupyo sa Brgy. Tocalana, Lal-lo, Cagayan, assistant parish priest sa St. Vincent Ferrer sa Solana sa susamang lalawigan.
Sumala sa biktima, una siyang gilugos sa pari niadtong Pebrero ning tuiga human kini gidala sa usa ka hotel taliwa nga supak sa iyang kabubut-on.
Gi-utro pa matod pa ang pagngabuso sa pari sa makadaghan higayon didto sa hotel ingon man sa sakyanan ug bisan sa sulod sa kombento hangtod sa petsa 15 niining bulana.
Sumala sa dalagita, nahadlok siya nga mosumbong tungod kay gibaharan siya sa pari nga ipakalat niini ang ilang video nga pasekreto niining gi-record atul sa pag-rape niini kaniya.
Wala na matod pa maka-agwanta ang biktima sa balik-balik sa pagpangabuso, hinungdan nga nisumbong na kini sa iyang maestra ug ginikanan.
Niadtong Oktubre 18 dihang na-atlan sa mga ahente sa NBI nga gitawagan ang bata sa maong pari ug gibaharan kini nga ipakaylap niya ang video kung dili mu-uban kaniya.
Nadakpan ang pari sa pag-parking niini sa iyang sakyanan uban ang bata sa ngitngit nga dapit sa Brgy. Igira.
Apil sa mga kasong gipasaka batuk sa pari ang paglapas sa R.A. 7877 o Anti Sexual Harassment Act; R.A. 9262 o Violence Against Women and their Children Act; R.A. 9995 o Anti-Photo and Video Voyeurism Act, ug R.A. 7610 kon Child Abuse.
