BUTUAN CITY – Dako ang pagtuo sa amahan ni Red Jean Alfeche alyas Chin-Chin nga duna’y kalabutan sa parcel delivery ang motibo sa pagpatay sa biktima tungod kay wala sila’y nasayran nga duna kini naka-away.
Sa eksklusibong pakighinabi sa Bombo Radyo Butuan, gibutyag sa amahang si Allan nga adiser ang pagluba-luba patay sa iyang anak sulod sa gi-abangan niining balay sa Purok 3, Brgy. Banza ning siyudad sa Butuan, duna na’y nakalalis nga parcel deliverer ang iyang anak.
Nabantayan usab sa amahan nga halos kada-adlaw duna’y parcel nga ihatod sa balay sa iyang anak nga posibleng ang uban dili na mabayran. Kini human nga gisultihan sa usa ka parcel deliverer ang usa sa iyang mga anak nga pasultihan ang biktima nga dili magpataka og order.
Kini usab ang iyang gitu-uhang hinungdan nga gipa-agi lang sa suspetsado ang pagsulod sa balay sa iyang anak sa pag-deliver og parcel tungod sa gidala niining karton nga maoy diay ang gisudlan sa kutsilyong gigamit pagpatay kang Chin-Chin.
Ang dili malimtan nga eksena sa amahan kadtong iya nang nakasugat ang killer ug gisinggitan siya nga patay na ang iyang anak. Nadunggan usab niya ang iyang anak nga samtang nagtinga na, gibalik-balik pa niini sulti ang mga pulong nga ‘I love you’ ngadto sa 2-anyos niyang anak nga babaye.
