BUTUAN CITY – Nanawagan si Pangulong Ferdinand Marcos Jr., og restraint ug de-escalation sa kasamtangang giyera sa Middle East ug sa uban pang parte sa kalibutan.
Sa iyang pamahayag sa UN General Assembly, gipunto sa Pangulo nga mahinungdanong ihunong ang giyera og erespeto ang internasyonal law, lakip ang United Nations Charter ug humanitarian law.
Gitumbok usab sa Pangulo nga dapat mobalik ang tanan sa panig sa negosasyon aron makab-ot ang kalinaw.
Dugang pa niini nga dugay nang nakighiusa ang Pilipinas sa pagpabilin sa pangkalibutanong kalinaw ug seguridad.
Isip pamatood gibutyag sa Pangulo nga usa ang Pilipinas sa mga unang nasud nga mitubag sa panawagan sa United Nations para sa tabang niadtong Korean war nga nagpakita nga lig-on nga baruganan sa nasud sa paghatud sa kalinaw sa kalibutan.
Sa pikas bahin, miapela usab si Pangulong Marcos sa international community nga patunhayon ang diplomasya, pagpugong sa tensyon, ug pagrespeto sa pangkalibutanong balaod aron mahunong ang mga armadong away sa nagkadaiyang parte sa kalibutan.
Gitumbok sa Pangulo nga nag-atubang ang kalibutan sa dakong hagit sama sa mga giyera sa nagkadaiyang rehiyon, humanitarian crises, ug misamot nga epekto sa climate change.
Matud pa niini nga importanteng, mahinungdanon ang kooperasyon sa mga nasud aron mapabilin ang kalinaw ug kalig-on sa pangkalibutanong komunidad.
Gipamugos ni Pangulong Marcos nga dugay nang katimbang ang Pilipinas sa mga peacekeeping mission sa UN, diin kapin 15,000 ka Filipino troops na ang napadala sa nagkadaiyang parte sa kalibutan aron motabang sa pagpabilin sa kalinaw ug seguridad.
Gitumbok usab sa Pangulo nga padayon nga molihok ang Pilipinas sa mga hisgutanan sa climate action, humanitarian assistance, ug tawhanong katungod isip kabahin sa responsableng pag-apil niini sa pangkalibutanong komunidad.
