BUTUAN CITY – Gipanghinambog ni Pangulong Ferdinand R. Marcos Jr. nga “very productive” ang iyang working visit sa New York, Estados Unidos human giduso ang kandidatura sa Pilipinas sa UN Security Council, gibitbit ang katungod sa kababayen-an ug gi-aghat ang mga Amerikanong imbestor nga magnegosyo sa nasud.
Sa iyang pagtambong sa ika-70 sesyon sa Commission on the Status of Women, gitumbok sa Pangulo nga nasukod ang tinood nga paglambo sa nasud sa kahimtang ug kagahum sa kababayen-an.
Gihisgutan usab niya ang kamahinungdanon sa edukasyon, pakighiusa batuk sa pag-abuso sa kababayen-an ug ang partisipasyon nila sa paghimo og desisyon.
Nakigpulong usab si Marcos kang UN Secretary-General António Guterres diin gipamugos niya ang padayon nga suporta sa Pilipinas sa United Nations ug multilateralism.
Sa atubangan sa mga miyembro sa UN General Assembly, gitumbok niini ang ka-importante sa rule of law ug malinawo nga pagresolba sa mga away.
Subling gipahayag sa Pangulo ang pangandoy sa Pilipinas nga mahimong non-permanent member sa UN Security Council para sa termino sa 2027–2028 aron mahatagan og tingog ang Indo-Pacific, mga developing ug climate-vulnerable countries.
Samtang nakigkita usab si Marcos sa pipila ka business leaders, lakip ang U.S. Medical Glove nga nagplanong magtukod og manufacturing facility sa nasud nga mamahimong magmugna og kapin 2-mil ka trabaho. Nakigpulong usab siya sa mga opisyal sa J.P. Morgan aron hisgutan ang kooperasyong pang-ekonomiya ug mga isyung pangkalibutan nga nakaapekto sa financial markets.
