BUTUAN CITY – Malipayong gitaho ni Bombo International News Correspondent Rev. Fr. Daryl Coke Prieta sa Rome, Italy ang maayong kalambuan sa panglawas ni Pope Francis.
Sigon ni Rev. Fr. Prieto nga sa unang higayon wala na migamit ang santo papa og mechanical ventilation hinoon ang gigamit nalang mao ang highflow oxygen sa pagtulog.
Pagbutyag pa sa pari nga usa ka ma-anindot kining kalamboan sa panglawas sa Santo Papa dayung panghinaot nga hingpit na kining maulian aron makabalik sa Vatican og makaserbisyu sa simbahan og sa katawhan.
Apan sa karun wala pay petsa kung kanus-a kini makagawas sa ospital ilabina kay gibutyag sa mga doktor nga ipadayon ang pulmonary og physical Therapy aron ma-andam ang lawas sa Santo Papa aron dili kini mabughat.
Hinoon giklaro ni Fr. Prieto nga bisan og kini na ang ika-lima nga semana nga naa sa ospital ang Santo Papa, wala niini napasagdan ang trabaho diha sa simbahan.
Kamatooran niini ang halos kada semana nga dunay e-appoint nga bag-ong Obispo samtang bag-ohay lang gipirmahan ang usa ka gasa sa Diocese sa Roma nga pagtukod og balay alang sa mga walay pinuy-anan.
Gipa-ambit nalang sa Pari nga ang pagka-ospital karun sa Santo Papa mao ang higayon nga nakig-unong kini sa katawhan nga masakiton. Awhag nalang niini sa tanan nga ipadayon ang pag-ampo alang kang Pope Francis.
Si Bombo International News Correspondent Rev. Fr. Daryl Coke Prieta sa Rome, Italy sa pakighinabi sa Bombo Radyo Butuan.
