BUTUAN CITY- Gitangtang na ang tanang miyembro sa Police Regional Office Bangsamoro Administrative Region Mobile Force Battalion 14B (PRO BAR RMFB) tungod sa giingong hazing batok sa labing menos 129 ka bag-ong recruit, sumala sa Philippine National Police (PNP).
Ang insidente nahitabo sa headquarters sa RMFB sa Barangay Ubit, Lamitan City, Basilan diin gipailalom ang mga recruit sa duckwalking, pagpahigda ug pagpa-roll sa yuta, ug pisikal nga pagpanghampak gamit kahoy ug arnis, base sa inisyal nga police report. Sumala sa PNP spokesperson nga si Brig. Gen. Randulf Tuaño, gipuli ang tanang miyembro sa 14B sa mga sakop sa Mobile Force Battalion 14A, ug kapin sa 70 ka pulis ang administratibong gipahawa.
Positibo nga giila sa mga complainant ang 12 ka non-commissioned officers nga sakop sa mga suspetsado, samtang ang police report nagtudlo usab sa 5 ka corporals, 5 ka patrolmen, ug uban pang John Does.
Ang reklamo unang gisumite sa usa ka recruit, nga gisundan sa testimonya sa 18 ka classmates ug dayon sa 110 pa ka uban, nga tanan karon gi-medical evaluation.
Gipahimangno sa PNP nga adunay zero tolerance sa hazing, ug ang mga mapamatud-an nga responsable pagaatubangon sa criminal ug administrative cases.
Samtang nagpadayon ang imbestigasyon, personal nga gibisita sa PRO BAR director nga si Brig. Gen. Jaysen de Guzman ang mga recruit aron tan-awon ang ilang kahimtang, ug ang National Police Commission Bangsamoro naglunsad usab sa kaugalingong imbestigasyon.
