BUTUAN CITY – Padayon karung giila sa kapulisan sa Trento, Agusan Del Sur ang mga suspetsadong naka-riding-in-tandem nga mipusil patay sa usa ka biyudo sa niaging alas 2:45 sa buntag sa may P-4, Barangay Poblacion sa maong lungsod.
Naila ang biktima nga si Joan Cahilis, 32-anyos, biyudo, usa ka panday nga taga P-1 Barangay Angas, Sta. Josefa, Agusan Del Sur.
Sa imbestigasyon sa ginsakpan sa Trento Municipal Police Station, nag-inom matud pa sulod sa videokihan sa P-4, Barangay Poblacion, lungsod sa Trento ang biktima sa dihang dunay nakalalis nga duha ka kustumer.
Pipila ka oras ang nakalabay, mipauli na ang biktima nga gisundan matud pa mga suspetsadong naka-motor ug pag-abot sa nahitaboan, gipusil ang biktima gamit ang .45 nga pistola.
Igo sa nagkalain-laing parte sa lawas ang biktima nga miresulta sa hinanaling kamatayon. Dali usab nga misibat ang mga responsable sa wala matinong direksiyun.
