BUTUAN CITY – Subling gibuhi ang panawagan nga papa-ulion na sa China ang staff ug ang ambassador sa Chinese Embassy nga nakabase sa Pilipinas human ang seryosong insidente sa Ayungin shoal niadong Hunyo 17 ning tuiga.
Sigon sa maritime law expert nga si Dr. Jay Batongbacal, waa nila nahimo ang ilang katungdanan alang sa pagpalig-on sa diplomatikong relasyon.
Wala matud pa nakatabang ang Chinese Embassy sa pagtubag sa nagpadayon mga isyu sa West Philippine Sea nga anaa sulod sa exclusive economic zone sa Pilipinas.
Pamugos pa sa opisyal, bisan og seryoso ang nahitabo human naputlan og kumagko ang usa sa mga sundalo sa nasud, dili matud pa kini rason aron makig-giyera, himuon muhimo og mga diplomatikong paagi aron maresolba kini alang sa kalinaw sa tanan.
Sa pagkakaron, nagsilbing Chinese Ambassador to the Philippines si Huang Xilian kinsa una nang igirekomenda sa pipila ka mga Senador nga pabalikon na sa China tungod sa balik-balik na nga agresibong aksyon sa China sa West Philippine Sea apil na ang pagpamomba og water cannon sa mga barko sa Pilipinas.
Una nang gibutyag kaniadto ni Pangulong Ferdinand Marcos Jr. nga dili kinahanglang i-expel si Huang tungod kay bisan og pulihan kini og bag-ong envoy, padayon pa gihapong ipadayag ang naratibo o posisyon sa China pag-abot sa mga isyu sa gi-ilugang kadagatan.
