BUTUAN CITY – Gi-awhag ni Pangulong Ferdinand R. Marcos Jr. ang mas lawom nga panaghi-usa ug pagpakabana sa isigkatawo, dungan sa pormal nga pagsugod sa balaang bulan sa Ramadan.
Sa iyang mensahe alang sa komunidad sa mga Muslim sa Pilipinas ug sa tibuok kalibotan, gipadayag sa Pangulo nga ang maong sagradong bulan mahimong dalan aron mas mapalig-on pag-usab ang pagtinabangay ug pagsinabtanay sa katilingban.
Ang matag oras nga igahin alang sa pag-ampo ug pagpamalandong, usa matud pa ka higayon aron mapalambo ang disiplina ug pagkamapa-ubsanon, nga magpaduol sa matag usa ngadto sa presensya ni Allah.
Sumala sa Pangulo, kini ang nagsilbing tulay padulong sa mga gidamgo nga kaluoy, hustisya, ug matinud-anong pag-alagad. Gipasalig usab ni Pangulong Marcos ang iyang pakighiusa sa mga pag-ampo alang sa padayon nga kalamboan ug kaayohan sa matag pamilyang Pilipinong Muslim.
