BUTUAN CITY – Gidugok sa bagang duot sa katawhan ang Panaad 2022 sa may Sitio Iyao, Brgy. Anticala ning siyudad nga gisugdan kaganina pang ala-dos sa kaadlawon kansa mao ang pnaka-una human kini gisuspende sulod sa duha ka tuig tungod sa COVID-19 pandemic.
Kini subay na sa pagbalaan ning Biernes Santo ilabina nga duna’y unlimited nga libreng sakay alang niadtong mga debotong nanguban sa maong kalihukan.
Apil sa gibutangan og mga sakyanang maghakot sa mga deboto ang Sports Complex sa Brgy. Libertad, Guingona Park, crossing sa Brgy. Tiniwisan ug Rutonda sa Brgy. Ampayon.
Una nang gipadayag sa mga organizers sa maong kalihukan nga wala’y angayang kabalak-an tungod kay han-ay na ang siguridad sa maong lugar.
Atua usab sa maong lugar ang mga first aid responders sama sa taga-City Health Office, Philippine Red Cross-Butuan/Agusan chapter ug uban pa.
Una nang nagpahimangno ang mga organizers ngadto sa manguban nga obserbahon kanunay ang minimum health protocols ug magdala kanunay sa vaccination cards tungod kay pangitaon kini sa entradang bahin sa nasangpit nga site.
Gihangyo usab niini ang mga deboto nga dili na magdala og mga bata ug mga masakiton alang ra usab sa ilang kaluwasan.
Nanawagan usab sila sa tanan nga dili magdala og back pack aron dili sila mababagan sa pag-apil tungod kay bawal man kini alang sa siguridad sa tanan.
Apil sa ilang gipanawagan ang pagpunit sa maagi-ang basura ug dili magpataka og labay niini aron mamintina ang kahinlo sa palibot.
Nagmontar usab sila og portable toilet aron duna’y kadangpan ang mga duna’y tawag sa kina-iyahan.
