BUTUAN CITY – Bisan sa kadako na kaayo sa cash incentives nga gihatag kang Olympic double gold medalist Carlos Yulo, naghanyag usab si kanhi Ilocos Sur Governor Luis Chavit-Singson og P5-milyon ngadto sa pamilya Yulo apan kini ubos sa ka kondisyon.
Sa iyang social media account, gibutyag ni Singson nga ang ihatag niyang kantidad, dili tungod kay nakasakmit og medalyang bulawan si Caloy apan kini ihatag lang kung magbalik ang maayong kabubut-on sa maong pamilya.
Madumdumang nabulabog ang isyu sa ilang pamilya ilabina tali kang Caloy ug sa iyang inahang si Angelica nga nag-ugat sa paggamit niini sa nadag-ang kwarta ni Caloy nga wala’y pananghid.
Dugang sa kanhi gobernador, nabati niya ang kasakit sa usa ka amahan nga duna’y bangi sa anak kansa misamot dihang wala gi-imbitar ni Caloy ang iyang pamilya sa pagsugat sa iyang pag-abot.
Aminado usab kining dili dali nga subling hi-usahon ang mag-inahan tungod sa ilang bikil.
Wala malilong sa tanan nga ugat usab sa bikil sa mag-inahan ang pagsupak ni Angelica sa relasyon ni Caloy kang Chloe Asjeleigh San Jose.
