BUTUAN CITY – Nanawagan kang Pangulong Rodrigo Duterte ang mga kabanay sa Agusanon domestic helper sa Riyadh, Saudi Arabia nga matud pa naghikog aron mahatagan og hustisya ang iyang pagkamatay.
Duda ang pamilya ni Jovelyn Barrios, residente sa Purok 3, Brgy. San Teodoro sa lungsod sa Bunawan, Agusan del Sur nga duna’y foul play ang pagkamatay niini tungod sa pila ka higayong gilimbod sa iyang li-og ang pisi og duna pa kini mga samad sa lawas.
Sa eksklusibong interview sa Bombo Radyo Butuan, gipadauah sa igsoon ni Jovelyn nga si Jovanni nga imposibleng magpakamatay ang kini tungod kay wala kini’y gisulti kanila nga problema ilabina nga mu-uliay na kini karong Agusto og pulos malipayong mga posts usab ang makita sa iyang Facebook account.
Posible matud pang ang amo sa iyang igsoon ang mipatay niini tungod kay dili sila gustong mupa-uli si Jovelyn human nasayrang dili na kini mubalik pa higayong maka-abot na sa Pilipinas.
Gusto usab matud pa sa amo sa biktimang na-ila lang nila sa pangalang Abdullah nga didto na ilubong ang iyang igsoon kansa hugot nilang gibalibaran tungod kay gusto nilang ma-imbestigahan ang pagkamatay niini.
Nanawagan usab si Jovanni kang Pangulong Duterte nga tabangan silang mapa-uli na sa labing daling panahon ang patay’ng lawas sa iyang igsoon ilabina nga duna kini duha ka mga anak nga naghuwat kaniya. (Beth Ruiz)
