BUTUAN CITY – Dakong kakurat usab sa amahan ni Cdt 1stCL Kim Harold Gilo dihang gipahibalo ang iyang pamilya dinhi sa dakbayan sa Butuan nga rank 3 kini sa 2024 graduating class sa Philippine Military Academy kon PMA.
Sa eksklusibong pakighinabi ning sibyahan, gibutyag sa amahan niini nga si Fire Inspector Florentino Gilo Jr., nga wala sila magdahom sa kalampusang nasakmit sa ilang anak tungod kay isip uniformed personnel, sayod siya kon unsa ka lisod ang agi-an sa mga anaa sa Philippine Military Academy.
Apan dili na matud pa kini ikatingala sanglit nasayod man ang maong opisyal nga pokus gayod sa pag-eskwela ang iyang anak gawas nga mahadlokon usab kini sa Dios.
Saysay sa proud nga amahan nga nibati siya og kabalaka tungod kay dili kusgan sa pisikal nga aspeto si Kim, ug napasubo lamang kini pagsulod sa akademiya tungod kay sa ilang duha sa iyang maguwang, siya man ang nakapasar sa physical examination.
Dugang sa amahan nga mas nisamot pa ang iyang kabalaka nga nahibaw-an na lamang nila nga nagpunay diay og hilak ang iyang anak sulod sa PMA tungod kay halos dili niini makaya ang pisikal nga training.
Nasayrang bag-ohay lamang usab ninggradwar sa Philippine National Police Academy ang maguwang ni Cdt 1stCL Kim Harold, butang nga gipasalamatan og dako ni Fire Inspector Gilo ngadto sa kahitas-an.
