BUTUAN CITY – Gipasalamatan sa pamilya ug kabanay ni Cadet 4th Class Darwin Dormitorio ang Ginoo ingon man ang ningsuporta kanila aron mudaug lang ang kaso ni Darwin.
Sumala sa pamilya Dormitorio, satisfied sila sa hukom sa korte batok sa tulo ka akusado nga hinungdan sa kamatayon niini samtang nagtungha sa Philippine Military Academy o PMA sa Baguio City ilabina ang inahan sa biktima nga si Jasmine Dormitorio kinsa nakahilak ug nagdanguy-ngoy samtang kamulo gibatbat ang sentensiya batok nila kanhi PMA Cadets 3rd Class Shalimar Imperial Jr ug Felix Lumbag Jr ug Julius Carlo Tadena.
Sumala sa inahan ni Darwin, unta pinaagi sa pagkasakripisyo sa kinabuhi sa iyang anak, hingpit nang ma-undang ang hazing ug bisan unsa mang klase sa pagmaltrato sa mga kadete sulod sa academy.
Sumala niini, bisan sa grabeng kasakit, mibati gihapon siya’g kalooy ngadto sa mga ginikanan sa mga konbiktado kay pulos raman usab sila mga biktima.
Sigon usab sa igsoon ni Darwin nga si Dexter, gipasalamatan usab nila ang lokal nga pangamhanan ingon man sa tanang ningsuporta kanila aron lang makab-ot ang gitinguhang hustisya.
