BUTUAN CITY – Hugtanong gipanghimakak ni 1st LT Krisjuper Punzalan, Civil Military Operations kon CMO officer sa 3rd Special Forces Arrowhead Batallion, Philippine Army ang alegasyong gibaboy sa militar ang patay’ng lawas ni Jevilyn Cullamat, anak ni Bayan Muna partylist Rep. Eufemia Cullamat human kini nakalas sa engkwentro sa Marihatag, Surigao del Sur.
Sa eksklusibong pakighinabi sa Bombo Radyo Butuan, gibutyag sa opisyal nga makasulti ang mga igsoon ni Jevilyn kung gi-unsa nila pagpahiluna ang patay’ng lawas sa 22-anyos nga rebeldeng New People’s Army human kini gibiyaan lang sa iyang mga nanibat nga ka-ubanan human ang 45-minutong engkwentro.
Dugang ni Punzalan, mihatag na sila og tabang pinansyal, transportasyon ug security assistance ngadto sa kabanay niini aron madala sa mortuary ang biktima sa ingon mahatagan og maayong lubong.
Saysay pa ni Punzalan, adiser ang engkwentro, nakadawat na sila og mga reports gikan sa IP community kalabot sa presensya sa armadong grupo og dihang nakumpirma sa ilang gihimong validation, naghulat na lang sila sa kamanduan alang sa operasyon hangtud nga natumbok sa tropa ang lokasyon sa mga kaaway nga miresulta sa 45-minutos nga engkwentro.
Gibana-bang 30 ka mga rebelde ang lang na-engkwentro tungod sa ilang narekober nga mga duyan sa encounter site.
Dugang sa opisyal, dihang duna na’y casulaty human sa engkwentro, wala sila maka-ila sa identity sa biktima ug na-ilhan lang dihang nakanaog na ang patay’ng lawas nga na-ilhan sa mga kanhi niini kaubanan ug ankumpirma sa mga igsoon sa biktima.
Nagtuo matud pa ang mga igsoon ni Jevilyn nga nagtungha kini sa kauluhang Manila g hapit na mu-graduate tungod kay mao kini ang gipatuo kanila.
Gani, gisaaran kini sa usa niya ka igsoon nga regaluhan og motorsiklo human og graduate rason nga nakurat na lang sila dihang nakalas na diay kini atol sa engkwentro.
Gidepensahan usab sa opisyal ang pamahayag ni Bayan Muna partylist Rep. Carlo Isagani Zarate nga gibaboy nila ang patay’ng lawas ni Cullamat dungan sa pagbutyag nga gipakita lang nila sa publiko ang nakab-ot nga kalampusan sa militar isip kabahin sa ilang dokumentasyon.
Sa pagkakaron, hugot ang ilang koordinasyon tali sa pamilya Cullamat kinsa naka-ila na nila tungod sa mga community programs nga ilang gipatuman.
Gitambagan na matud pa nila ang mga niini nga dili magpadala sa mga isyu ug mas tu-uhan ang ilang panaghigalaay ug ang kamatu-urang nasaksihan kung kinsa sa duha ka grupo ang mibaboy kang Jevilyn.
Bukas usab sila pagtubag sa uban pang panginahanglanon sa pamilya Cullamat.
