BUTUAN CITY – Milagro alang sa inahang si Elena Carig, residente sa Brgy. Canlanipa, Surigao City, ang pagkaluwas nilang pamilya taliwa nga ilalom lang sa salog sa ilang balauy sila nagtago.
Sa eksklusibong pakighinabi sa Bombo Radyo Butuan, gipadayag ni Elena nga naninda siya niadtong Huwebes dihang mihapak na si Odette ug pagka-alas dos sa hapon, kalit lang matud pang mikusog ang huros sa hangin rason sa pagkalagpot sa iyang mga tinda.
Gipasagdan na matud pa niya ang mga tinda ug gi-una ang pagtapok sa mga iyang upat ka mga anak.
Dinhi na matud pa gilangkat sa iyang bana ang pipila sa ilang salog sa balay ug nagkabot sa yuta hangtud sa giladmong taga-tuhod nga igo lang silang masulod.
Mi-abot matud pa sa upat ka oras kapin ang ilang pagtago kondiin ila pang gipa-ilawman ang ilang mga anak aron dili bation og katugnaw ug dihang milurang na ang bagyo, nawala na ang usab ang ilang mga bungbong ug atop ug salog na lang ang nabilin nga maoy nagsalipod kanila aron dili madala sa hangin.
Tungod kay puno na ang eskwelahan nga maoy gihimong evacuation center, nagdesisyon sila nga didto na lang magtago sa bangag nga gikalot sa iyang bana.
Ang grabe kakusog nga bagyo nga kadto pa niya nasinatian, naghatag matud pa og kalisang sa iyang mga anak kinsa maninggit na sa pag-ampo nga dili una sila patyon.
Ang iya matud pang anak nga dalaginding mi-ampo sa Ginoo nga paabton siya sa iyang adlaw nga natawhan nga kagahapong adlawa nga buhi, uban ang ilang pamilya.
