BUTUAN CITY – Mikalas na sa Miss Universe Philippines – Butuan organization ang pambato sa Miss Universe Philippines 2025 nga si Jadine Capawa Banagan, pila ka adlaw human ang malampuong coronation night nga nadag-an ni Ahtisa Manalo.
Sa iyang Facebook post, nanghinaut ang Butuanon beauty queen nga masabtan sa tanan ang iyang desisyon human ang ma-ampingong konsiderasyon pagkalas na sa iyang kalambigitan sa maong organisasyon.
Kini human niya nabati nga mas maka-ayo sa iyang kaugalingon nga dili na malambigit pa sa maong organisasyon sa pagtuo nga ang kasamtangang mga sirkumstansya ug direksyon nga iyang gisubay, wala matud pa mahi-uyo sa iyang mga values ug expectations.
Isip pagklaro, wala matud pa siya’y gipirmahan ug wala usab siya gihatagan og kontrata nga pirmahan bisan og nangayo siya niini sukad pa sa pagsugod sa iyang journey.
Magpagawas matud pa siya og official statement kung gikinahanglan aron ipagawas ang iyang panig pinaagi sa interview.
Gipasalamatan usab niya ang ang kahigayunan nga na-apil siya sa MUP journey, apan hugot ang iyang pagtuo nga kini ang pinaka-maayong desisyon ug mag-move forward na.
Nanghinaut usab siya nga ang organisasyon ug tanang nalambigit niini, nagtinguha sa pinaka-maayo alang sa umalabot nga mga paningkamot.
Nagpasalamat usab siya sa pagsabot ug sa tanang padayong misuporta kaniya.
