BUTUAN CITY – Gi-angkon ni Atty. April Joy Balano, provincial election supervisor sa Commission on Elections kon COMELEC-Surigao del Sur ang sipyat nga nahitabo human wala napasa gilayon ang Certificate of Canvass kon COC sa pagka-presidente og Besi-presidente ngadto sa kongreso nga nagsilbing National Board of Canvassers kon NBOC.
Kini ang tubag sa provincial election officer human nag-isyu og memorandum ang COMELEC central office aron pangayuan sila og pagpasabot nga maoy hinungdan nga nadelatar ang gihimong canvassing sa NBOC human wala makita ang COC gikan sa Surigao Del Sur ug uban pang lalawigan.
Sa eksklusibong pakighinabi sa Bombo Radyo Butuan, gipasabot ni Atty. Balano nga una siyang gipahibalo ni Congressman Johnny Pimentel mahitungod sa nahitabo og iyang nasuta nga nasagol sa laing envelope ang unta alang sa kongreso og nadala kini pagbalik sa probinsiya kansa wala niya makita tungod kay selyado ang envelope.
Dali niya kining gi-transmit pagbalik pinaagi sa Viber account sa congressional secretariat.
Sumala ni Atty. Balano, siya ang manubag sa maong insedente diin mihatag na siya og pagpasabot sa nahitabo sa atubangan sa kongreso ug napasa na usab ngadto sa NBOC ang physical copy niini.
