BUTUAN CITY – Mas gipakusgan pa ang pagtanom og bombay dinhe sa siyudad sa Butuan sa tabang sa Agriboost Project sa lokal nga kagamhanan.
Human nahimong malampuson ang pinakaunang higayon sa pagtanom sa sibuyas sa Butuan City bisan paman sa ulan nga panahon niadtong Buwan sa Abril, nakaani og 94 kilos sa bombay ang maguuma nga sila Victor Carampatana ug Charita Murcota sa Brgy. Bit-os.
Karung buwan sa Mayo, gisugdan na ang preparasyon sa binhi sa sibuyas dili lang sa Brgy. Bit-os lakip na sa Brgy. Nongnong ug Brgy. Anticala diin kapin usa ka ektaryang luna ang tamnan niini.
Sa tabang sa Agriboost Project sa LGU Butuan, gitudloan sa bag-ong teknolohiya sa pagtanom og sibuyas ang mga maguuma nga kanhe pulos gulay lang ang gitanom sama sa talong, okra, kamatis, sitaw ug uban pa.
Gilauman nga mahimong maayo ang resulta sa pagtubo sa sibuyas aron makaani og de-kalidad nga klase sa sibuyas sa paglabay sa upat ka buwan.
