BUTUAN CITY – Maayo ra matud pa ang kahimtang sa mga kababayang Filipino nga atua karon sa Texas, USA human mihapak ang Hurricane Harvey.
Sa pakighinabi ning sibyahan, gibutyag ni Dennis Satorre, usa ka OFW nga nagtrabaho didto sa Sugarland, Texas, nga ok ra matud pa ang ilang sitwasyon didto tungod kay sayo man usab sila nga nakapangandam subay sa paghapak sa maong bagyo.
Sigon niini nga ang nagrabehan gyud ug maayo nga nadamyos sa pagkakaron mao ang downtown Houston kangsa nabahaan gyud ug maayo.
Gani adunay pipila ka mga parte niini ang halos mutupong na sa mga roadsigns sa kalsada ang gilawmon sa baha.
Matud pa nga kung itandi sa mga nanglabay’ng kalamidad, mas grabe matud pa karon ang sitwasyon tungod sa kalapad sa lugar nga apektado ug halos shutdown gyud ang tanan sa tibuok syudad sa Houston.
Gidugang pa niini nga sa karon, padayon gihapon nga gipatuman ang mandatory evacuation sa mga lugar nga grabeng naapektuhan sa baha.
Padayon pa usab nila gihapong nasinate ang pagbundak sa makusog nga ulan. Ilaha usab nga gikabalaka karon ang pagsaka na sa water level sa ilang mga reservoir o dam.
Subay niini, gilauman na usab nila ang gikatahong pagbisita ni US President Donald Trump sa ilang lugar ugmang adlawa. (Mon Aplaya)
