BUTUAN CITY – Andam na ang Philippine Ports Authority kon PPA-Nasipit pagpatuman sa Memorandum Circular No. 14-2020 sa Department of Transportation kon DOTr nga nagmando sa tanang mga pasahero nga kinahanglang magsuot og face shield pagsaka sa barko sugod karong Agusto 15.
Sa eksklusibong pakighinabi sa Bombo Radyo Butuan, gipadayag ni PCol. Jose Maria Yares, nga nag-paskil na sila og impormasyon kalabot niini alang sa mga pasaherong padulong sa Cebu City tungod kay wala pa’y biyahe karon padulong sa kauluhang Manila human kini subling gipa-ilalom sa Modified Enhanced Community Quarantine kon MECQ.
Sa susamang adlaw dihang gipagawas sa DOTr ang maong kamanduan, nagpagawas usab og pahibalo ang kadumalahan sa PPA nga nagmando sa tanan nilang branches nga sundon ang maong kamanduan rason nga naglusad sila og information dissemination sa ilang mga pasahero.
Apan sila sa ilang buhatan, taud-taud nang mipatuman niini. Dugang ni Col. Yares, ang MARINA na ang duna’y hurisdiksyon pagsilot sa tag-iya sa barkong masapong duna’y ilang pasaherong dili magsuot og face shield sugod karong Agusto 15.
