BUTUAN CITY – Pormal nang sa New People’s Army Western Agusan del Norte-Agusan del Sur kon NPA-WANAS sub-regional committee nga sila ang responsable sa pagsunog sa lima ka mga motorsiklong gipanag-iyahan sa mga sundalo.
Sa eksklusibong pakighinabi sa Bombo Radyo Butuan, ngadto sa nagpa-ilang tigpamaba maong grupo, gibutyag ni Ka Omar Ibarrra nga ilang gihimo ang maong lakang tungod kay ang nasangpit matud pa nga mga sakyanan ang gigamit sa paghimo sa mga sundalo og libuog nga binuhatan ngadto sa mga sibilyan.
Gihimong pananglitan ni Ka Omar ang pagpatay matud pa sa mga sundalo ngadto nga Jose Un ahan nga taga-Purok Tagbabacon, Brgy. Culit lungsod sa Nasipit, Agusan del Norte.
Gigamit usab matud pa ang maong mga sakyanan sa ilang military operations pasulod sa kabaryuhan aron dili matud pa daling mamatikdan sa mga tawo nga sila mga sundalo.
Gani, pipila usab sa gisunog nga mga motorsiklo wala’y plaka rason nga gigamit matud pa kini sa ilegal nga kalihukan sa mga sundalo.
Sa laing bahin, gipahayag usab ni P/Sr. Insp. Henry Samiliano, hepe sa Butuan City Police Station 5 nga padayon ang ilang pag-gukod sa mga responsable kauban nila ang militar.(Beth Ruiz)
